సమస్యా పూరణం.

 

సమస్యా పూరణం.

సమస్య : బారనంగ మురిసె బాపనయ్య

 

నా పూరణ:

అంబరమునుతాకు నధిక ధరలతోడ

అలసి సొలసి పోయె అయ్య వారు;

"సంతలోన దొరకు సరుకెంతయో చౌక

బా" రనంగ మురిసె బాపనయ్య

 

సమస్య : సవతినిఁ గని సీత మిగుల సంతస మందెన్

 

(శ్రీరాముని అశ్వమేధయాగ సందర్భం)

భువిలో రాజ్యము బెంచగ

భవభయ హరుడౌ రఘుపతి బంగరు సీతన్

నవహయ మేధమున నిలుప

సవతినిఁ గని సీత మిగుల సంతస మందెన్

 

సమస్య : దౌర్భాగ్యము నిచ్చి ప్రోచు దామోదరుఁడే!

 

నా పూరణ:

నిర్భయమగు ముక్తి కొరకు

దుర్భరమగు తపము సల్పు ధూర్తుని నైనన్

నిర్భరమగు ప్రీతి విరియ

దౌర్భాగ్యము నిచ్చి ప్రోచు దామోదరుఁడే!

 

సమస్య: శారదయే బలిగొనెఁ గద జను లెందరినో!

 

నా పూరణ:

భారము బాపన బ్రతుకులు;

నేరక వేదము చదివిరి; నేటి దినమునన్

వరునకు వధువది దొరకదు

శారదయే బలిగొనెఁ గద జను లెందరినో!

 

నది - మది - పది - గది

పై పదాలను ఉపయోగిస్తూ గురుశిష్య సంబంధాన్ని వివరిస్తూ నచ్చిన ఛందస్సులో పద్యాన్ని వ్రాయండి.

 

పదిలమైనవిద్య పదుగురి మేలుకై

గురుకులాన గదిని గురువు తెల్పు;

నదియు తెలిసి కొనుచు నానా విధమ్ముల

మంచి శిష్యుడెపుడు మదిన నిల్పు

 

 

సమస్య: "కోడిమాంసమ్ము హితము యోగులకుఁ దినఁగ"

 

నా పూరణ:

దేశ రక్షణ సల్పెడి ధీరులకును

కోడిమాంసమ్ము హితము; యోగులకు దినగ

కాయ గూరలు పండ్లును కంటె నధిక

హితము గూర్చెడి ఆహార మెందు గలదు?

 

సమస్య: సర్వజ్ఞుండైనవాఁడు చంద్రుఁడె సుమ్మీ

 

నా పూరణ:

(చంద్రబాబుని మనసులో పెట్టుకుని)

సర్వుల హితమును గోరుచు

సర్వసమర్ధుడు పవిత్ర సంగమమునకై

ఉర్విన నదులను కలిపెను

సర్వజ్ఞుండైనవాఁడు చంద్రుఁడె సుమ్మీ

 

సమస్య: ఖరపథంబు సౌఖ్యకారకంబు

 

నా పూరణ:

ఓర్పు గూర్చి మనకు నేర్పులే పాఠంబు

ఎంత బరువు నైన ఇట్టె మోయు

"గాడిదన్న" తిట్టుకాదు పొగడ్తరా!

ఖరపథంబు సౌఖ్యకారకంబు

 

సమస్య: ధారణ లేని కవియె యవధానిగ నెగడున్

 

నా పూరణ:

ధారాళముగా పద్యము

ధారణ చేసిన కవులను ధాత్రిని మరువన్;

పూరణ, ప్రేరణ, వర్ణన

ధారణ లేని కవియె యవధానిగ నెగడున్

 

సమస్య: సతతము వినుమ! స్తవనీయ సత్కథ లెల్లన్

నా పూరణ:

మితముగ మాటలు బలుకుచు

రతనము బోలెడి నడతల రమణీయముగా

పతనము చెందక నడువుము

సతతము వినుమ! స్తవనీయ సత్కథ లెల్లన్.

 

 

దేశము - కోశము - పాశము - నాశము

పై పదాలను ఉపయోగిస్తూ దేశభక్తిని ప్రబోధిస్తూ

నచ్చిన ఛందస్సులో పద్యాన్ని వ్రాయండి.

 

నా పూరణ:

దేశము నాదని తలుపక

నాశము కోరెడి జనుండు నావాడై నన్

కోశము నందలి కత్తియె

పాశము త్రెంపును మరువకు భారత యువతా.

 

సమస్య: దుర్మార్గము గాదు గురుల దూషించినచో

 

నా పూరణ:

ధర్మము పేరిట మోసపు

కర్మలు జేయుచు మతమును గప్పుకు బ్రతికే

దుర్మత బాబా లెందరొ ?

దుర్మార్గము గాదు గురుల దూషించినచో

 

సమస్య: మీసములన్ గనంగగలమే యిక మేదిని నెందుగాంచినన్

 

నా పూరణ:

(ఆంధ్ర రాష్ట్రానికి కాంగ్రెసు బీజెపి చేసిన అన్యాయం చెబుతూ)

చేసిరి తప్పిదమ్మొకటి చీకటి మాటున జీల్చి రాష్ట్రమున్;

మోసము జేసిరిర్వురును ముచ్చట గొల్పెడి ఆంధ్రజాతికిన్;

వేసము నందునన్ కపట వియ్యము నందున ఆరితేరుచున్;

మీ సములన్ గనంగఁ గలమే యిక మేదిని నెందుఁ గాంచినన్!

 

సమస్య: అన్ని పాదాల వరుసగా "శి - వ - రా - త్రి" వచ్చేలా శివస్తుతి.

 నా పూరణ:

శివుడు సత్యము సర్వము; శివుడె మాయ;

వదలు బంధాలు జన్మలు వాని గొలువ;

రాయిలోనెగాదుచరాచ రమున గలడు;

త్రిణయనునిగొల్వ కష్టాలు తీరు నయ్య.

 

 

 

చలించేది నీనయితే చలించని వాడెవ్వడు?

అంతా శివం అయితే శవమైన వాడెవ్వడు?